Այսօր՝ մայիսի 11-ին, արտառոց դեպք է տեղի ունեցել Երևանում։ Ժամը 05:40-ի սահմաններում ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Շենգավիթի բաժնում օպերատիվ տեղեկություններ են ստացվել, որ Բագրատունյաց պողոտայում՝ ժողովրդին ավելի հայտնի «գիշերային թիթեռնիկների» հավաքատեղիում, վիճաբանություն է տեղի ունեցել և կա վիրավոր։

Shamshyan.com-ի փոխանցմամբ, նշված հասցե է մեկնել ոստիկանության Շենգավիթի բաժնի հերթապահ խումբը՝ հատկապես կարևոր գործերով ավագ համայնքային ոստիկանի գլխավորությամբ։

Տեղում պարզվել է, որ ժամը 04:50-ի սահմաններում նշված պողոտայում մարզերից մեկի բնակիչ 30-ամյա Գ. Մ.-ին է մոտեցել անծանոթ մի տղամարդ և վերջինիս կողմից սեռական ծառայություններ մատուցելու վերաբերյալ հետաքրքրվելուց հետո, ըստ Գ. Մ.-ի այդ տղան սկսել է անհիմն բռունցքներով հարվածներ հասցնել իր մարմնի տարբեր մասերին և դիմել է փախուստի։

Կարճ ժամանակ անց Գ։ Մ.-ին է մոտեցել սեռական ծառայություններ մատուցող՝ մարզերից մեկի բնակիչ 29-ամյա Ն. Վ.-ն և նրա ձեռքից խլել պայուսակը, ապա դիմել փախուստի։

Տեղում Գ. Մ.-ն հայտնել է, որ պայուսակի մեջ եղել է 1 մլն 460 հազար դրամ գումար։

Դեպքի փաստով ոստիկանության Շենգավիթի բաժնում «կողոպուտ» հատկանիշներով նախաձեռնվել է քրեական վարույթ։
Ոստիկանությունը ձեռնարկում է անհրաժեշտ միջոցառումներ՝ կասկածյալ տղամարդուն, «գիշերային թիթեռնիկ» Ն. Վ.-ին և գողոնը հայտնաբերելու ուղղությամբ։